Drježdźany (dpa/SN). Sakske spěchowanske myto za film je sej lětsa němsko-francoska režiserka Gwenola Heck wu­dobyła. Z 20 000 eurami dotěrowane ­myto Filmoweho swjedźenja Drježdźany dóstanje w Němskej dźěłaca filmowča za swój animaciski film „Gaïa“, zdźěli wjednistwo festiwala. „Dobyćerski film ćehnje paralelu mjez namocu přećiwo přirodźe a přećiwo ćěłu čłowjeka“, wopodstatnja jury narodneho wubědźowanja swój rozsud. Dohromady běchu na 38. Filmowym swjedźenju Drježdźany 17 mytow z cyłkownej hódnotu 72 500 eurow spožčili. Wosom juryjow a publikum wuzwolichu z dohromady 65 krótkofilmow w srjedźoněmskim, narodnym a mjezynarodnym wubědźowanju swojich faworitow, zdźěli festiwal. Filmy su na wjacorych městnach sakskeje stolicy pokazali, mjez nimi běchu tež někotre serbske paski.

Sofija (dpa/SN). Po wólbach parlamenta, kotrež běchu w Bołharskej zašo hač poprawom planowane zarjadowali, připowěduja prognozy wulki wuspěch něhdyšeho prezidenta Rumena Radewa. Wjacore instituty, kiž slědźa za měnjenjom ludnosće, rozprawjeja, zo je sej zwjazk Progresiwna Bołharska (PB) hač do 45 procentow hłosow zdobył. Zwjazk ně­hdyšeho generala Radewa zastopnjuja ­jako Ruskej přichileny. W parlamenće z dohromady 240 sydłami by sej zwjazk z tutym wólbnym wuslědkom dohromady hač do 140 městnow zawěsćił a z tym absolutnu wjetšinu měł. Doskónčny hamtski wuslědk wočakuja najpozdźišo štwórtk. Na wosmych wólbach po aprylu 2021 bě so po informacijach instituta ­Alpha Research něhdźe 51 procentow wšěch wólbokmanych wobdźěliło.

We wólbnym boju bě Radew Bołharskej, kotraž je z čłonom EU a NATO, stabilne knježerstwo a zadźěwanje korup­ciji přilubił. Nimo toho planuje wón reformu justicy, za čož pak trjeba wjetšinu 160 wot 240 zapósłancow, wšako dyrbi za to wustawu změnić. Prěni wulki ­nadawk knježerstwa budźe etat za lěto 2026, kotryž lońšeje krizy knježerstwa dla přeco hišće nimaja.

Leo XIV. a Donald Trump staj so zašłe dny werbalnje rozestajałoj

Luanda (dpa/SN). Bamž Leo XIV. so w rozestajenju z prezidentom USA Donaldom Trumpom wo wotpinanje konflikta prócuje. Někotre z jeho wuprajenjow njeběchu ludźo „we wšěch aspektach korektnje“ wukładowali, rjekny nawoda katolskeje cyrkwje we wobłuku swojeje jězby po Africe po puću do Angole. „Su to tak rozumili, jako chcył prezidentej znapřećiwić. Tole docyła mój wotmysł njebě.“

Trump a Leo běštaj so z distancy chětro wadźiłoj, štož bě nowinarjam wjacore powěsće hódne. US-ameriski prezident wumjetowaše bamžej po někotrych apelach za měr „grawoćiwu“ wonkownu ­politiku. Krótko po tym wón wot kumštneje inteligency generowany wobraz wo sebi jako Chrystus w interneće wozjewi.

Leo znapřećiwi: „Njeboju so knježerstwa Trumpa.“ Pozdźišo rěčeše, bjez toho zo by jednotliwych politikarjow z mjenom mjenował, wo „horšći tyranow, kotřiž swět niča“. Tute wuprajenja běchu žurnalisća často zwjazali.

Hdyž dźensa něchtó wjetšu sumu pjenjez inwestuje, ludźo wo nim za chribjetom tež raz praja, zo drje ma přewjele fenkow. Snano je sej tole tež tón abo tamny wopytowar myslił, kiž je sobotu saněrowany hród Pakosnica blisko Hamora wopytał. Haj, tam je wobsedźer Enrico Kral zawěrno wjele pjenjez inwestował, zo by z dodźeržaneho twarjenja woprawdźity bajkojty hród nastał. Wo inwestoru pak njeměli zachribjetnje rěčeć, ale před nim skerje kłobuk zejmować. Wón dźě móhł swoje pjenjezy tež hinak wužiwać, sej na přikład luksurioznu łódź kupić a z njej po Srjedźnym morju płachtakować. Ale ně, wón radšo hród saněruje a tak přinošuje, zo by architektoniska drohoćinka jako mały dźěl łužiskich stawiznow dale widźomna była, byrnjež w priwatnych rukach. Tajkich idealistow móhli zawěrno wjace trjebać, přetož płachtakowacych bohačkow je hižo dosć, dodźeržanych twarjenjow pak hišće wjele. Marian Wjeńka