W Kamjenskej chorowni zawru kliniku za gynekologiju a porodnu pomoc

Kamjenc (SN/BŠe). Wobydlerjo Hornjeje Łužicy su přesłapjeni. Wčera je wjednistwo chorownje swj. Jana w Kamjencu njejapcy připowědźiło, zo lětsa 31. meje kliniku za gynekologiju a porodnu pomoc zawru. Nošer bywšeje chorownje Maltezow je wot lěta 2021 Towaršnosć za strowotu a zastaranje Sakska ze sydłom w Hamburgu. „Wobžarujemy a njezrozumimy njewočakowane a krótkodobne zawrjenje“, Kamjenski wyši měšćanosta Michael Preuß zdźěli. „Rozsud naše město w sensibelnym času chětro trjechi a ma daloko sahace wuskutki za přichodne swójby, medicinski personal a wěste wuměnjenja nastupajo strowotniske zastaranje na městnje.“ Dale wyši měšćanosta na to skedźbni, zo je chorownja nowinarjam napřećo hišće spočatk lěta tajku kročel wuzamknyła. „Porod dźěsća je wosobinski a wuznamny wokomik – ćim wažniše je, zo maja swójby bliske, spušćomne a kwalitatiwnje wysokohódnotne hladanje.“ Z toho bórze ničo wjace njebudźe. Přichodnych staršich nětko wulka njewěstosć a organizatoriske wužadanja wočakuja.