Knježerstwo ze zastupjerjemi hospodarstwa a dźěłarnistwow so zešło
Berlin (dpa/SN). Měrjo so na wulke reformy, kiž maja słabemu hospodarstwu w Němskej wotpomhać, pyta čorno-čerwjena koalicija konsens z dźěłodawarjemi a dźěłarnistwami. Po zetkanju w kanclerskim zarjedźe wčera, srjedu, rjekny rěčnik knježerstwa Stefan Kornelius: „Zastupjerjo knježerstwoweje koalicije so wjesela, zo chcedźa zastupjerjo hospodarstwa a dźěłarnistwow proces reformow konstruktiwnje podpěrować.“ Unija a SPD chcetej so mjenujcy hač do lěćneje přestawki srjedź julija na puć rubace reformy dojednać. Kancler Friedrich Merz (CDU) bě tuž wšěch wažnych zastupjerjow knježerstwa a hospodarstwa do kanclerskeho zarjada přeprosył, mjez nimi prezidenta zwjazka dźěłodawarjow Rainera Dulgera a předsydku zwjazka dźěłarnistwow (DGB) Yasmin Fahimi. Wuradźowali su po wuprajenjach Korneliusa wo situaciji na dźěłowych wikach, wo stabiliće a socialnym zawěsćenju, wo wottwarje běrokratije a wo dawkowej politice.
