Za nic wjac cyle štyri měsacy chce so dalša serbska delegacija z koparkami a koparjemi do Awstriskeje podać, tam na europeadźe našu domiznu zastupować a so po móžnosći tež wuspěšnje wobdźělić. Referent Domowiny za kulturu a wukraj Clemens Škoda ma tónraz wšitke nitki w horšći. Delegaciski nawoda je so mjez druhim hižo sčasom wo přebywanišćo w Korutanskej starał kaž tež wo transport do krasneje kónčiny. Najwjetše wužadanje pak za njeho w minjenych měsacach zawěsće bě mustwje z Hornjeje a Delnjeje Łužicy hromadu wjesć. Kak je puć dotal wotběžał, je wón Jurjej Bjeńšej w rozmołwje přeradźił.
Knježe Škoda, njedawno sym w Serbskim rozhłosu tuchwilnu situaciju nastupajo wubranku kritisce komentował. Předewšěm zjawnostne a medialne dźěło, ale tež jasne wuprajenja k zestajenju kadra přińdźechu nam žurnalistam, ale tež fanam překrótko. Kak sće wosobinsce jako delegaciski nawoda na to reagował?