Laura Ryćerová (naprawo) je minjeny kónc tydźenja zaso wuspěšnje za Berlinski team Mücke Motorsport šrubowała. Tón bě so w ni­žozemskim Zandvoorće na wubědźowanju formule 4 wobdźělił. Rodźena Šunowčanka wuknje tuchwilu w čěskim měsće Vysoké Mýto powołanje awtomechanikarki. W swobodnym času je mjez druhim tež hižo za mišterstwa turowych wozow Engstler­ Motorsport a Münnich Motor­sport dźěłała. Foto: Toni Ryćer

SJ Njebjelčicy

– Biskopičanske KT II 1:2 (1:0)

Zestawa domjacych: Hahn (45. Matješk) – D. Kral, Hanuza, Haška, Šołta, O. Domš (45. Hrjehor), Čornak (45. F. Ričel), Plaettner (45. F. Domš), Mikławšk (45. Hölzel), Korjeńk, Wagner (45. Pawlik)

Za poslednju přihotowansku hru prěnjeho koparskeho mustwa Njebjelčanskeje SJ měješe trenarski zapřah nimale połny kader k dispoziciji. Tak móžeše hosći­ćel hišće raz wšelake formacije wu­pru­wować. Spočatne tempo pak posta­jowaše młode mustwo z Biskopic. Wosebje dobre běhanske puće hrajerjow bjez bula skićachu jim prěnje akcije z wrotowym wotzamknjenjom. Poněčim so tež Njebjelčanam poradźi wuspěšnje po dołhosći a šěrokosći hrajnišća kombinować. Kopicu móžnosćow před wrotami pak njezamóchu z poslednjej konsekwencu zakónčić. W 22. min. wšak sej sylnu fazu krónowachu. Po tym zo bu Wiliam Plaettner po hnałej přihrawce w šěsnatce jasnje dźeržany, rozsudźi sudnik na pokutny kop, a tón Rony Hanuza wěsće přetwori. Partija wosta hač do połčasa napjata, z dobrymi składnosćemi na woběmaj bokomaj.

Tabulka wokrjesneje ligi, stafla 2

1. ST Hlinowc 1 9 :0  3

2. SZ Wóslink/Skaskow 1 5 :2  3

2. HZ Lubuš/Bluń 1 5 :2  3

2. HZ Łaz/Běły Chołmc 1 5 :2  3

5. HZ Wojerowski FC II 1 2 :1  3

6. ST Wulka Dubrawa 1 4 :4  1

6. SV Haselbachtal 1 4 :4  1

8. Traktor Malešecy 1 3 :3  1

8. HZ Rakecy II/Šćeńca 1 3 :3  1

10. ST Radwor 1 2 :2  1

10. HZ Hórnikečanski jězor 1 2 :2  1

12. SJ Njebjelčicy 1 1 :2  0

13. Módro-běli Minakał 1 2 :5  0

13. FSV Łuty 1 2 :5  0

13. ST Nadrózna Hrabowka 1 2 :5  0

16. SJ Chrósćicy II 1 0 :9  0

SJ Njebjelčicy

– HZ Wojerowski FC II/Wětnica-Hola 1:2 (1:2)

Zestawa domjacych: Matješk – Kral, Hanuza, Haška, Gödig, Domš (66. Mikławšk), Plaettner, Čornak (44. Hoelzel), Šołta, Korjeńk, Wagner (58. Ričel)

Awtor dźensa

Beno Šołta

To čitach před někotrymi dnjemi w nowinach: „Christina Obergföll dóstanje nětko, jědnaće lět po olympiskich hrach w Pekingu, slěbornu medalju za mjetanje hlebije. Tehdy bě wona bronzu dobyła. Tola nětko je doskónčnje jasne, zo bě Rusowka, dotal druha, doping wužiwała. Tak tehdyšu medalju zhubi. Zasad­nje je to w mojimaj wočomaj prawy krok, ale přepozdźe. Dopingowe testy ho­dźa­ so w běhu dnjow wuhódnoćić. Jenož běrokratije dla je so wšitko tak dlijiło. Němska mjetarka hlebije Obergföll hižo někotre lěta wjace aktiwnje njesportuje. Slěbro tuž za nju dźensa přewulki wo­znam nima, kaž praji.

Jako zastupich do němskeje triatlonoweje unije, dyrbjach podpisać, zo njewužiwam doping a zo smědźa mje stajnje po wubědźowanjach kontrolować. To drje hišće njejsu, ale móžu sej derje předstajić, kak móže to sportowca boleć, je-li něchtó druhi pod wliwom dopinga lěpši był. Sy wšitke mocy mobilizował, lěta dołho trenował, zo by spěšny był, ale něchtó je někotre sekundy abo metry lěpši – tola z pomocu chemije a nic pilnosće a česćelakomnosće.