Lodowi piraća Crimmitschau – Liški Běła Woda 3:4 (1:0, 2:3, 0:1)
Po někotrych poražkach w minjenych hrach wopušćichu Łužiske liški lodowu płoninu zaso raz jako dobyćer. A potom hišće w derbyju! To bě za hrajerjow a wosebje přiwisnikow módro-žołtych wažne dobyće, byrnjež w tutej sezonje hladajo na tabulku wjac ničo docpěć njemóhli. Domjacy nastupichu w njezwučenych militarnych trikotach, dokelž chcychu na padnjenych němskich policistow a wojakow spominać. Do wrotow hosći nawróći so zaso Mac Carruth, štož mustwu chětro tyješe, wšako zaso raz njesměrnje derje dźeržeše a tak běše wón hromadźe z Luisom Rentschom muž dnja.
W prěnjej třećinje mějachu domjacy wjac wot hry a dźěchu tež zasłužbnje z 1:0 do prěnjeje přestawki. Zapadni Saksojo třělachu husćišo na wrota a tak poradźi so jim w 14. min. nawjedowanje.