Bjezdwěla stej krajej Sakska a Braniborska do kónčneje rozprawy komisije za rozrost, strukturnu změnu a dźěło mnohe zajimawe namjety nastupajo serbsku rěč, kulturu a identitu zapřijałoj. Jasnje z tych pokazkow dwoje wuchadźa: Hdźe wočakujemy jako mały lud podpěru za swoje prócowanja a hdźe móhli ze swojimi specifiskimi nazhonjenjemi łužiskej towaršnosći takrjec něšto wróćić. To jedne kaž to tamne swědči wo tym, zo su sej najwšelakoriši akterojo serbskeho žiwjenja hłójčku łamali. Nastał je mozaik, kiž budźe zamoł­witych w Drježdźanach a Podstupimje naročnje wužadać, dyrbja-li wo tym rozsudźić, što so hdy zwoprawdźa abo scyła nic. Kotre z namjetowanych pro­jektow potajkim budu přizwolić? Dosaha zapodate hesło, kaž w padźe „Serbskeho kompetencneho centruma za hospodarstwo a strukturnu změnu“, abo su pohłubšace wudospołnjenja trěbne? Snadź je to tež druhorjadne. Za wažniše mam, zo su Serbja telko idejow podali. Axel Arlt

Drježdźany (dpa/SN). W Sakskej so přiběrajcy starosćeja, zo Wulka Britaniska bjez zrěčenja z Europskeje unije wustupi. Tole je wuslědk wčerawšeho wuradźowanja w Sakskim krajnym sejmje. Zdobom sej zastupnicy wjacorych frakcijow wot EU reformy žadachu. Zapósłanča Zelenych Claudia Maicher, sakskemu knježerstwu wumjetowaše, zo njeje na brexit přihotowane. Šef statneje kenclije Oliver Schenk (CDU) připowědźi přechodny zakoń, kiž ma předewzaćam a wobydlerjam prawnisku wěstotu skićić.

W debaće porěča tež serbski zapósłanc CDU w krajnym sejmje Marko Šiman. „Zhladujemy z wulkimi starosćemi na bližacy so brexit Wulkeje Britaniskeje“, Šiman rjekny. Wón je sej wěsty, zo so wustup kraja sylnje na EU wuskutkuje a zo změje to direktne sćěhi za Saksku a za jeje­ wobydlerjow. Swobodnemu statej je Wulka Britaniska ze 2,66 miliardami eurow­ třeći najwažniši wikowanski partner. Nimo toho wobsteja wjelelětne wědomostne, kulturne a turistiske styki. Tole­ měli dale wobchować, tak Šiman.

Zawodna zhromadźizna skónčenja zmilinjenja brunicy dla

Choćebuz (dpa/SN). Na internej zawodnej zhromadźiznje su dźensa dopołdnja něhdźe 1 700 přistajenych łužiskeho hórniskeho a energijoweho předewzaća LEAG wo najnowšich namjetach k skónčenju zmilinjenja brunicy informowali. Na zarjadowanju w Choćebuzu wobdźělištaj so tež ministerskej prezidentaj Sakskeje a Braniborskeje Michael Kretsch­mer (CDU) a Dietmar Woidke (SPD). Při tym dźěše wo poručenja wot knježerstwa zasadźeneje wuhloweje komisije. Ta bě minjeny kónc tydźenja namjetowała, zmilinjenje brunicy najpozdźišo w lěće 2038 skónčić. Brunicowe kónčiny měli za to cyłkownje 40 miliardow eurow dóstać. Na zhromadźiznu přizjewiłoj staj so tež předsyda industrijneho dźěłarnistwa hórnistwo, chemija, energija, Michael Vassiliadis a šef předsydstwa LEAG Helmar­ Rendez. LEAG je po swójskich informacijach najwjetši energijowy za­staraćel wuchodneje Němskeje. We Łužiskim brunicowym hospodarstwje dźěła po informacijach braniborskeho hospodarskeho ministerstwa 8 000 ludźi.

Choćebuz (dpa/SN). Město Choćebuz je z wida wustawoškita „hotspot“, potajkim centrum prawicarskeho ekstremizma w Braniborskej. „Za nas jako wustawoškit je tole toksiske stworjenje“, rjekny referatny nawoda zjawnostneho dźěła braniborskeho wustawoškita Heiko Homburg sćelakej rbb. Při tym jedna so wo wjelestronsku scenu ze zwiskami do rockeroweho miljeja, do sceny stražnikow při durjach a k wěstotnym předewzaćam. „Woni chcedźa pak tule subkulturu wopušćić.“ Čłonojo sceny zaměrnje na tym dźěłaja, so w měsće kruće zadomić a tam dźeń a bóle postajować. Miljej so dale a bóle zhusća. W centrumje prawicarskich ekstremistow steja po rešeršach sćelaka „wodźacy čłonojo prawicarskeho zeskupjenja Inferno Choćebuz“. Tole běchu sćelakej wjacori fachowcy potwjerdźili.

Koparski ligist FC Energija Choćebuz bě wčera posedźenje kulojteho blida ze zastupnikami wustawoškita a policije za spočatk měrca připowědźił. Tam chcedźa problem, kiž so přiběrajcy w stadionach jewi, tematizować. „Wokomiknje njejsmy sej za to transferneje doby dla hišće chwile brać móhli“, club zdźěli.