Zwjazkowy wonkowny minister Němskeje, Frank Walter Steinmeier, (SPD) je sej kónc měrca chwile wzał, zo by so z danskim hamtskim kolegu Martinom Lidegaardom w Berlinje zetkał a swja­toč­nje wozjewił, zo hižo 60 lět měr a hłu­bo­ke přećelstwa zwiski mjez statomaj symbolizuja. 1955 běše Konrad Adenauer začuće měł, zo je po sto lětach wojerskich ro­ze­stajenjow načasu, zmužitu kročel sčinić. Adenauer trjebaše přizwolenje Danskeje za přistup ZRN k NATO, a tak dóńdźe k Bonnsko-Kopenhagenskim dojednanjam, kotrež su swobodu zmyslenja Mjeńšinodanow znowa rjadowali.

Tuchwilu je 70 procentow wobydlerjow Danskeje Němskej napřećo pozi­tiwnje zmyslenych. Žiwjenje w danskej mjeńšinje je cyle njewobćežene, móhł tuž čłowjek měnić. Atraktiwita namjezneho městačka Flensburga je so tež kulturnje do směra na sewjer derje wuwiła, a tak čuješe so Steinmeier na swjedźenskim akće w Berlinje k tomu powołany, Flensburg bórze jako prěnje dwurěčne město Němskeje pomjenować. Wopraw­dźe dóstawa „danski być“ tuchwilu wulke sympatije.