Němski wonkowny minister Steinmeier: Jednajće zamołwiće
Washington/Riad (dpa/K/SN). Napjatosće mjez Iranom a Sawdi-Arabskej, nastate z atakowanjom sawdi-arabskeho wulkopósłanstwa w Teheranje po wotprawjenju šiitiskeho duchowneho Nimra al-Nimra, načinjeja mjezynarodnje dale a wjetšu starosć. USA su wobě stronje k poměrnosći namołwili.
Němski wonkowny minister Frank-Walter Steinmeier (SPD) apelowaše na Iran a Sawdi-Arabsku, krizy njedać dale eskalěrować. „Nětko trjebamy w regionje akterow, kotřiž zamołwiće jednaja, w Riadźe runje tak kaž w Teheranje“, rjekny Steinmeier nowinje Bild. Turkowska je tohorunja wobaj krajej napomniła wšeho so pasć, štóž móhło połoženje přiwótřić. „Region je hižo na kromje rozbucha“, zwurazni wicepremier Numan Kurtulmus po posedźenju knježerstwa w Ankarje.