Sakski hospodarski minister Martin Dulig turistikarjow wopytał

Budyšin (SN/BŠe). Region mjez Drježdźanami a Zhorjelcom, Žitawu a łužiskej jězorinu ma wjele wosebitosćow. „Tu njeje žana tema, wo kotruž njezamóžemy so starać“, podšmórny dźensa dopołdnja nawoda Budyskeje turistiskeje informacije Jens-Michael Birke. Sprjewine město bě prěnja stacija lětnjeje tury sakskeho hospodarskeho ministra Martina Duliga (SPD). Lětsa wěnuje wón swoju třidnjowsku turu turizmej, zo by so wo hospodliwosći, mjezynarodnosći a kwaliće serwisa wobhonił. Wězo je tež mjezy překročace dźěło dalše wažne ćežišćo, wo kotrymž chce minister z turistikarjemi rěčeć. „Mi je wažne so z ludźimi na městnje rozmołwjeć. Chcu wědźeć, što su jich aktualne wužadanja“, bě Dulig hižo do zahajenja swojeje tury rjekł.