Zeznach Pětra Felfu z Trupina w septembrje 1953 na nowozałoženej Serbskej wyšej šuli w Pančicach-Kukowje jako šulerja 9. lětnika. Wjesnaj hólcaj zastupichmoj hromadźe z něhdźe 55 šulerjemi z Kamjenskeho a Budyskeho wo­krjesa do noweho kubłanišća. Prěni direktor bě Jan Handrik, nazhonity brigadnik powójnskich lět w Juhosłowjanskej. Rjadowniskaj wučerjej běštaj Mikławš Bejmak a młody Křesćan Čornak.

Rady spominamoj na zhromadne šulske lěta w Pančicach a do maturity 1957 na Serbskej rozšěrjenej wyšej šuli na Budyskej Flincowej. Pětr studowaše po maturje na Lipšćanskej Karla Marxowej uniwersiće skótne lěkarstwo. Ja po­dach so na studij mašinotwarstwa do Drježdźan na technisku uniwersitu. Hižo w Pančicach, pozdźišo w Lipsku, hdźež bě njeboćički 1960 předsyda Sorabije, a w župje „Jan Skala“ spřećelichmoj so z Tejom Bejmakom, synom našeho wučerja z Pančic. Za čas studija zetkawachmy so w Budy­šinje, Lipsku, w lěću w serbskich studentskich lěhwach w Hórnikecach abo w studentskich brigadach we Łazu, hdźež my smy třo hromadźe z Kitom Lorencom noweje brunicoweje jamy dla lěs pušćeli.