W sprjewinym měsće wčera znowa chětro napjata situacija knježiła

Budyšin (SN/JaW/MWj/MiR). W sprjewinym měsće so chětro wari, štož staja je do dale a špatnišeho swětła po wšěm swěće. Kaž hižo wutoru a srjedu je tež wčera wječor k napjatosćam na Žitnych wikach, tak mjenowanej „plaće“, dóšło. Něhdźe 350 ludźi bě so tam zhromadźiło.

Kaž policija zdźěli, su wosom njeskutkow registrowali, z nich jedne zranjenje ćěła. 30lětny bě kameramužej do ruki kopnył, dokelž njebě po zdaću spěšnje dosć kameru hasnył. „Policija je wčera wječor konsekwentnje zjawnu wěstotu a porjad w Budyšinje zaručiła. K njerjanym scenam kaž minjenej dnjej wčera na Žitnych wikach dóšło njeje. Strategija bě wuspěšna“, praji Budyski policajski direktor Uwe Kilz w nowinskej zdźělence. Werbalne rozestajenja kaž tež někotre njeskutki wužiwanja zakazanych symbolow a wuprajenjow přiwšěm zwěsćichu.