Drježdźany (SN/MkWj). Gertrud Wincarjowu z Čorneho Chołmca wuznamjenichu wčera ze Zwjazkowym zasłužbowym rjadom. Wona bě jedna z cyłkownje 13 wobydlerjow Sakskeje, kotrychž je zwjazkowy prezident Joachim Gauck za wusahowace zasadźenje na dobro towaršnosće počesćił. „Wy sće druhim z přikładom“, rjekny sakski ministerski prezident Stanisław Tilich (CDU) při přepodaću rjada w statnej kencliji. Wuznamjenjeni steja symbolisce za wulku wjetšinu ludnosće, „kotrejž je zhromadnosć wutrobita naležnosć, kotřiž so za towaršnosć angažuja a na dobro swětej wotewrjeneho a tolerantneho kraja njesebičnje dźěłaja“, Tilich zwurazni.