Marja Michałkowa za zastupjerjow serbskich zajimow rěčała
Drježdźany (SN/MiR). Skrótka a jadriwje rysowaše předsydka Rady za serbske naležnosće Sakskeje a čłonka zwjazkoweho sejma Marja Michałkowa (CDU) stejišćo gremija k sakskemu šulskemu zakonjej. Pjatk bě wona jedna z třinaće wěcywustojnych, kotřiž su so na zjawnym słyšenju wuběrka za šule a sport słowa jimali. Mjez nimi běchu předsydźa zwjazkow, zastupjerjo wučerjow, šulerjow a staršich. Swoje stejišćo zwuraznili su dale šulscy nawodźa wšelakich šulskich formow kubłanišćow w nošerstwje stata kaž tež tych w swobodnym nošerstwje.
Potrjebu na změny widźachu wěcywustojni mjez druhim na polu zaručenja wuknjenskich srědkow, socialneho šulskeho dźěła a inkluzije. Zastupjerjej Zwjazka sakskich městow a gmejnow kaž tež zwjazka sakskich wokrjesow kritizowaštaj, zo dóstawaja města a wokrjesy wot stata wjace nadawkow, nic pak personalne a financne srědki. Zasadnje pak zwuraznichu přitomni spokojnosć nastupajo změny zakonja po prěnim naćisku.