Berlin (dpa/SN). SPD je zwólniwa k rozmołwam, zo by so knježerstwowa kriza w Němskej přewinyła. To je jedyn wuslědk zetkanja zwjazkoweho prezidenta Franka-Waltera Steinmeiera z předsydu SPD Martinom Schulzom wčera na Berlinskim hrodźe Bellevue. Na to je nawodnistwo strony wo konsekwency z toho wuradźowało. W SPD množa so hłosy, w nuzowym padźe třeći raz wot lěta 2005 zwjazkarstwo z CDU a CSU wutworić. „SPD njemóže so kaž hejate dźěćo zadźeržeć“, rjekny minister justicy Heiko Maas (SPD). Unija bě wuzběhnyła, zo su socialdemokratam durje wotewrjene. Woni chcedźa nětko wuradźowanja Steinmeiera z frakciskimi předsydami stron w přichodnym tydźenju kaž tež dalšu proceduru, kotruž budźe zwjazkowy prezident namjetować, wočaknyć, rjekny generalny sekretar SPD Hubertus Heil.