Mjeńšinowy model jako imaterielne kulturne namrěwstwo nominowany
Flensburg (SN/at). Statnu mjezu přesahowacy němsko-danski mjeńšinowy model w Južnym a Sewjernym Schleswigu je za status imaterielneho kulturneho namrěwstwa UNESCO nominowany. Próstwu wo zapis do registra „dobrych přikładow z praksy“ organizacije Zjednoćenych narodow za kubłanje, wědomosć a kulturu wot wutory předleži, kaž Južnoschleswigska nowinarska słužba informuje. Wo přiwzaću do registra imaterielneho namrěwstwa UNESCO ma mjezystatny wuběrk kónc lěta 2021 rozsudźić.
Němsko-danski mjeńšinowy model je přikład měrniweho zhromadneho žiwjenja. Wurostł je wón z ludoweju wothłosowanjow w lěće 1920, po kotrymajž słuša sewjerna Schleswigska k Danskej, južna k Němskej. Charakteristiske je, zo ma wotpowědna wjetšina ludnosće mjeńšinu za jasne kulturne wobohaćenje regionow na woběmaj stronomaj mjezy.