Změna mjenoweho prawa hakle po wólbach zwjazkoweho sejma 2021
Budyšin (SN/at). Změna zakonja wo mjenowym prawje, kotraž by tež Serbowkam zmóžniła serbsku formu swojeho swójbneho mjena do pasa abo personalneho wupokaza zapisać dać, w tuchwilnej wólbnej periodźe zwjazkoweho sejma hač do lěća 2021 njebudźe. To wuchadźa z wotmołwy braniborskeho knježerstwa na małe naprašowanje Kalawskeje zapósłanče Krajneho sejma Braniborskeje Kathrin Dannenberg (Lěwica). Tam rěka: „Zwjazkowe knježerstwo je zdźěliło, zo chce hakle w přichodnej wólbnej periodźe wo reformowym namjeće rozsudźić.“
Knježerstwo w Podstupimje runja Lěwicy tajku změnu zakonja podpěruje. Wotpohladane rjadowanje wotpowěduje zdobom poziciji, kotruž je kraj minjene lěta w mjeńšinopolitiskim zhromadnym dźěle porno Zwjazkej zwuraznił, we wotmołwje knježerstwa dale rěka.
