Póst Germania Budyšin – Sokoł Ralbicy/Hórki 2:4 (1:3)
Zestawa hosći: Schöne – M. Matka, Wałda, Domaška, Materna, Šołta, Šewc, Korjeńk, Budar (81. Rachela), Nuk (90. Kř. Matka), M. Kurjat (73. G. Kurjat)
Po zliwkach minjenych dnjow njeby sej něchtó myslił, zo hodźała so hra na trawniku Pósta Germanije Budyšin přewjesć. Ale skónčnje pak tak bě. A k hrě so tež wjace njedešćowaše. Hrajnišćo pak běše mokre a hładke. Trenar Chrystof Gloxyn namołwješe swojich chowancow z ćěłom a dušu hrać a dwuboje přiwzać. Technisce rjana kopańca njebě tón dźeń tak prašana kaž hewak. Ze swojej zestawu trenar tež přećiwnika překwapi. Pětr Domaška hraješe w nutřkownym škiće (Tomaš Bejma bě chory) a w centralnym srjedźnym polu bě Fabian Korjeńk po jednym lěće přestawki swój comeback dał. Na lěwej stronje dósta młody Toni Nuk swoju šansu wot započatka hrać.