Ministerstwo, Budyski wokrjes a Załožba za serbski lud projekt podpěruja

Drježdźany/Budyšin (SN/at). Na historiskim městnje w Budyšinje ma „Serbski forum wědy při Lawskim arealu“ nastać. Za planowanje a zwoprawdźenje z narodneho wida naročneho předewzaća su so sakske ministerstwo za wědomosć, kulturu a turizm, wokrjes Budyšin a Załožba za serbski lud z „letterom of intent“ na wuske zhromadne dźěło a wzajomnu podpěru dojednali. Wo tym je ministerstwo wčera informowało. W nowym „forumje wědy“ matej Serbski institut ze Serbskim kulturnym archiwom a Serbskej centralnej biblioteku kaž tež Serbski muzej zaměstnjene być. Podpisarjo dojednanja maja přede­wzaće za tak wu­znamne, zo so wo to prócuja je jako krajny projekt namjetować za spěchowanje wotpowědnje inwesticiskemu zakonjej wo wuhlowych regionach w lěće 2021.