Drježdźany (SN). Sakska chcyła předewzaća při zaměstnjenju powołanskich dojězdźowarjow ze susodneje Čěskeje a Pólskeje zaso podpěrać, kaž ze zdźělenki hospodarskeho ministerstwa w Drježdźanach wuchadźa. Při tym mysla wosebje na zawody, dźěłace we wobłukach, kotrež su za system wažne.
Za kóžde přenocowanje přewostaja swobodny stat, kaž hižo nalěto wuspěšnje praktikowane, pawšalny připłatk 40 eurow na nóc. Dyrbjeli-li dalši swójbni sobu přenocować, na přikład dźěći, wupłaća jim 20 eurow.
Minister za hospodarstwo a dźěło Martin Dulig (SPD) k tomu wuswětla: „Z rjadowanjom podpěrujemy na jednym boku pólskich a čěskich dźěławych a zdobom předewzaća, kotrež su na fachowe mocy pokazane. Předewšěm w chorownjach a hladarnjach, runje njedaloko mjezy, trjebaja kóždu dźěłowu móc. Dźěławi njetrjebaja potom hižo wšědnje tam sem jězdźić, redukuja tak swoje kontakty a pomjeńša zdobom strach na koronawirus schorjeć, zo móhli swoje wažne dźěło wukonjeć.“
