Braniborska přiwótřa wot jutřišeho naprawy korony dla

Podstupim (dpa/SN). Wot jutřišeho płaća tež w Braniborskej krućiše wobmjezowanja koronapandemije dla. Knježerstwo SPD, CDU a Zelenych je wčera wotpowědne naprawy wobzamknyło. K nim słušeja zakaz, w nocy mjez 22 a 5 hodź. dom wopušćić, zawrjene wobchody nimo tych za wšědne zastaranje a zakaz silwesterskich praskotakow na centralnych městnach. Ministerski prezident Dietmar Woidke (SPD) rěčeše wo hłubokich zasahach. „Połoženje w Braniborskej je dramatiske.“ Wón pak ludźi namołwja naprawy akceptować a so po nich měć. Nowe prawidła płaća najprjedy raz hač do 10. januara. Wot jutřišeho smědźa wobydlerjo Braniborskeje jenož hišće dom wopušćić, hdyž dyrbja na dźěło, nakupować, do šule a pěstowarnje, k lěkarjej abo na zarjady. W nocy mjez dźesaćich a pjećich stej tež wuchodźowanje abo sport zwonka domu zakazanej. Wuwzaća su hody a silwester. Alkohol wostanje w zjawnosći zakazany. Policija a porjadniske zarjady chcedźa dodźerženje prawidłow kontrolować, warnowaše nutřkowny minister Michael Stübgen (CDU).