FC Energija Choćebuz je koparske towarstwo, kotrež móže na swoje dotalne wuspěchi horde być. Je pak tež zjednoćenstwo z wosebitosćemi, kaž to personalna statistika pokazuje. Dohromady je pola Delnjołužičanow dotal 525 hrajerjow zrěčenje dóstało. Mjez nimi bě nimale kóždy třeći z wukraja. Tak nošachu koparjo z 45 krajow dotal trikot FC Energije.
Jako so sezona 2000/2001 nachileše (to hraješe Energija prěni raz w zwjazkowej lize), postarachu so Łužičenjo samo wo wěčny rekord. Trenar Eduard Geyer nastaji tehdy prěni raz w stawiznach elitoweje ligi Němskeje jědnaće wukrajnych koparjow w startowej formaciji na hrajnišćo, a to přećiwo VfL Wolfsburgej. Pola Choćebužanow běše to zwučeny wobraz, zwonkastejacy pak zhladowachu skerje skeptisce na wuwiće Energije.