Wobstawaja na fairnym rozdźělenju spěchowanskich pjenjez

Hamor (AK/SN). Gmejna Hamor chce so zaměrnje z projektami na procesu změny strukturow we Łužicy wobdźělić. To podšmórny wjesnjanosta Achim Junker (CDU) na gmejnskej radźe spočatk tydźenja.

Gmejna chce próstwje wo spěchowanje za wažnej projektaj „Lěkarski dom“ a „Wjacezaměrowa hala“ stajić. Hač do měrca matej wonej hotowej być a Regionalnemu přewodźenskemu wuběrkej (RBA) předležeć. Prawdźepodobnje klětu w oktobrje wuběrk wo próstwomaj rozsudźi. Jeli spěchowanje přizwoli, móhli projektaj w lěće 2023 zwoprawdźić.

„Smy z wuwićowej towaršnosću Delnjošleska Hornja Łužica (ENO) a z towarstwom Perspektiwa Hamor wo přede­wzaću lěkarskeho domu wuradźowali. Běchmy sej přezjedni, zo hač do kónca měrca wotpowědnu próstwu wo spěchowanje ze srědkow za strukturnu změnu stajimy“, wujasni nawoda gmejnskeho zarjadnistwa Arian Leffs. Hižo 14. decembra chcedźa wo detailach rěčeć.