Załožbowa rada wčera jenož poł dnjoweho porjada wotdźěłała

Budyšin (SN/JaW). Rada Załožby za serbski lud je swoje wčerawše wuradźowanje dočasnje zakónčiła a dźěle dnjoweho porjada na přichodne posedźenje přestorčiła. Za přičinu njejapkeho kónca kaž tež wotprajenje planowaneje nowinarskeje konferency mjenowaše zarjad Załožby za serbski lud w nowinskej zdźělence krótkodobne a hłuboko sahace prašenja, „kotrež hakle w běhu posedźenja załožboweje rady wurosćechu a dyrbja so najprjedy rozrisać“. „Smy so z radźićelemi na to dojednali, zjawnje wo konkretnych přičinach njerěčeć“, doda direktor Załožby za serbski lud Jan Budar na naprašowanje. Kaž w e-mailce ze zarjada dale rěka, bu „posedźenje po dnjowym dypku 6 přetorhnjene“ a „wšitke dalše dypki dnjoweho porjada na druhi termin přestorčene“. Po informacijach załožby chcedźa spočatk julija dale wuradźować.