Drježdźany (SN). W juliju 2021 su sylne zliwki w Swobodnym staće Sakskej wulke škody zawostajili. Zo by wotstronjenje škodow a nowonatwar podpěrował, je Zwjazk přez swobodny stat spěchowanske srědki přewostajił. Ke koordinowanju a za centralnu organizaciju nowonatwara je sakske krajne knježerstwo ministerstwa přesahowacu dźěłowu skupinu pod nawodom sakskich statnych ministerstwow za hospodarstwo, dźěło, wobchad, energiju a ratarstwo zarjadowało.

Mjeztym su nastate škody z pomocu potrjechenych wokrjesow zwěsćili a dokumentowali. Po tym wučinjenja wobkrućene škody na infrastrukturje 101,1 milion eurow. Tak je móžno, kóždemu wokrjesej a komunam etat za sto procentowske zarunanje škodow zaručić. Po­trjechene komuny a wokrjesy dyrbja wotpowědne próstwy wo srědki zapodać.

Hižo loni w meji bě sakske krajne knježerstwo wobzamknyło, potrjechenym komunam nastate škody znajmjeńša k 75 procentam zarunać.