Wuradźowanje wo strategiji strukturneje změny w Drježdźanach
Drježdźany (dpa/SN). K přesadźenju projektow w zwisku ze strukturnej změnu we wuhlowych kónčinach je po měnjenju Sakskeje wjace spěšnosće, fleksibility a swobody trěbne. „Do systema dyrbi wjace powětra“, rjekny minister za regionalne wuwiće Thomas Schmidt (CDU) wčera po wuradźowanjach ze zastupnikami komunow wobeju rewěrow kaž tež hospodarstwa a dźěłarnistwa w Drježdźanach. Při tym dźe wosebje wo fleksibelnosć financneje podpěry, zo njebychu srědki spadnyli, hdyž njejsu projekty hač do kónca spěchowanskeje doby zwoprawdźene. Nimo toho měło so wobkedźbować, zo trjebaja wosebje wulkoprojekty we wobłuku wobchada abo slědźenja wjele chwile za planowanje.
Dwě lěće po schwalenju zakonja za inwesticije we wuhlowych kónčinach su po słowach Schmidta wjele docpěli. W Sakskej su 134 projektow wuzwolili, kotrež Zwjazk ze 90 procentami spěchuje a za to 1,5 miliardow eurow zaplanuje. Inwestować chcedźa w prěnim rjedźe do slědźenskeje infrastruktury, do wobchadneje a socialneje struktury a do bydlenjotwara.