London (dpa/SN). Wčera popołdnju je kralowna Elisabeth II. w starobje 96 lět w Šotiskej w swojej krajnej rezidency Balmoral zemrěła. Jej sćěhuje nětko jako kral jeje 73lětny syn Charles III. Z cyłeho swěta dochadźeja tuchwilu žarowanske listy. Zwjazkowy prezident Němskeje Frank-Walter Steinmeier piše kondolěrujo: „Kralowna Elizabeth II. je žona, kotraž je wobwliwowała cyły lětstotk.“ Zwjazkowy kancler Olaf Scholz (SPD) ma kralownu za „přikład a inspiraciju za miliony, tež w Němskej.“ Wón wuzběhowaše jeje zasadźenje za wujednanje mjez Jendźelskej a Němskej po Druhej swětowej ­wójnje. Něhdyša zwjazkowa kanclerka Angela Merkel wobkrući „wusahowacu hódnotu“ zemrěteje kralowny, „z jeje smjerću kónči so cyła doba.“ Sakski minis­terski prezident Michael Kretsch­mer (CDU) zwurazni na Twitter: „70 lět je wona wjedła Wulku Britanisku a Commonwealth z wulkej wobstajnosću a mocu po hoberskich změnach.“ W Sakskej zwostawa monarchka na wosebite wašnje w pomjatku. Tak je trakener-žrěbc Millenium z Moritzburga so wo dorost kobły z kralowskeje kobłarnje Dolce ­Luciana starał.