Berlin (SN). Po wólbach noweho prezidija Federalistiskeje unije europskich narodnosćow FUEN 1. oktobra 2022 w Berlinje je so mjeńšinowa rada štyrjoch awtochtonych mjeńšin Němskeje k rozrěči wo wozjewjenym stejišću k połoženju w Madźarskej zešła.
Prezident FUEN Loránt Vincze bě hižo do kongresa FUEN a tež po tym z kritiku na Europskim parlamenće napadnył, wot kotrejež so mjeńšinowa rada z nowinskej zdźělenku wuraznje distancuje. „Wotpokazujemy twjerdźenje, zo je rozprawa Europskeho parlamenta, kotraž wobswědča Madźarskej rozpadowanje demokratije, prawostatnosće a zakładnych prawow, dospołnje wopačna“, mjeńšinowa rada pisa. Europski parlament bě w swojej rozprawje nadrobnje rozłožił, zo je Madźarska na najlěpšim puću do awtokratije abo wólbneje awtokratije a zo su demokratiske institucije wosłabjene. Rozprawa wěnuje so dokładnje połoženju narodnych mjeńšin w Madźarskej a wosebje Romam.
Wumjetowanja Loránta Vinczeho, zo su wuprajenja rozprawy „wulka lěwicarska hromada ze starymi wěrnosćemi“ ale bjez faktow, mjeńšinowa rada raznje wotpokazuje.
