Znata Budyska kubłarka a komunalna politikarka Edith von Wolffersdorff je dźens tydźenja w 86. žiwjenskim lěće zemrěła.
Edith von Wolffersdorff je njeboh. Bywšu wučerku Rožšěrjeneje wyšeje šule „Friedrich Schiller“ w Budyšinje sym w lětach měrliweje rewolucije bliže zeznał, jako so za politiske a kulturne wobnowjenje w Serbach a Łužicy angažować počach. Nimo Günthera Hörenza, Jutty Mieth a Dietholda Tietza słušeše Edith von Wolffersdorff k wonym nowym a njepoćeženym komunalnym politikarjam w Budyšinje, kiž mje tehdy sobu do womłodźenja strony Willyja Brandta nawabichu; spočatk meje 1990 dach so skónčnje do SPD zapřahnyć. Krótko po tym – 23. meje 1990 – bu Edith von Wolffersdorff na štyri lěta do zastojnstwa Budyskeje decernentki za kubłanje a kulturu wuzwolena, ja sam pak nazymu na to po dwěmaj diktaturomaj jako zapósłanc SPD do 1. sakskeho krajneho sejma woleny – tohorunja na štyri lěta.