Prjedy hač so na wčerawšim posedźenju Budyskeje měšćanskeje rady dalšim temam wěnowachu, mějachu radźićeljo při naprašowanjach wobydlerjow a informacijach wyšeho měšćanosty wjacore naležnosće na wědomje brać.

Budyšin (CS/SN). We wobłuku hodźiny naprašowanja wobydlerjow dźěše na wčerawšim posedźenju Budyskeje měšćanskeje rady mjez druhim wo Budysku hwězdarnju. Wo njej porěča wodźer po měsće a čłon spěchowanskeho towarstwa hwězdarnje Andreas Thronicker. Wón připowědźi, zo chce so wotnětka na kóždym posedźenju měšćanskich radźićelow wobdźělić, doniž hwězdarnja do wobsydstwa města njepřeńdźe. Thronicker argumentowaše, zo je hwězdarnja kubłanske zarjadnišćo. Hinak pak hač w šulach a pěstowarnjach dyrbja čestnohamtscy sobudźěłaćerjo we hwězdarni wšitko sami zapłaćić. Na zakładźe wučbnych planow zakładnych a wyšich šulow kaž tež gymnazijow Thronicker dopokaza, zo su tam astronomiske temy do wučbneho plana wšelakich rjadowniskich schodźenkow kruće zakótwjene.