Šwikawa/Berlin (dpa/SN). 33 předewzaćow z ratarskeho, zežiwjenskeho kaž tež turistiskeho sektora zastupuje Saksku na lětušim Mjezynarodnym zelenym tydźenju (IGW) w Berlinje. To je pjeć wobdźělnikow mjenje hač na poslednich wikach do pandemije w lěće 2020. Přičiny za to su hospodarske ćeže wysokich energijowych płaćiznow dla, skedźbliwosć po koronowej přestawce a dołha přizjewjenska doba.

Sakski ratarski minister Wolfram Günther (Zeleni) rjekny na nowinarskej konferency wčera w Šwikawje, zo je runje w času krizow wažne, ratarstwo a zežiwjenske hospodarstwo hromadźe z turistiskimi iniciatiwami šěrokemu publikumej předstajić. „Z regionalnymi produktami smy dospołnje w trendźe,“ wón wudospołni. Jědnaće sakskich předewzaćow ma bio-certifikaciju, to rěka produkuje cyle abo podźělnje w bio-kwaliće. Nimo dołholětnych wobdźělnikow pojědźe lětsa jědnaće wustajerjow prěni raz na Zeleny tydźeń do Berlina, na přikład Drježdźanska whisky-manufaktura, Budyske rěznistwo Meister‘s kaž tež Łužiske agrarne drustwo Jězor z Niskeje, kotrež předstaja wudźěłki z lěwanćika.