Popjelnu srjedu běše stolica Hornjeje Łužicy zaso „sakski Passau“

Budyšin (SN/mb). Sydom mjeńšin po sedmich běše wčera wječor na połnje wobsadźenej měšćanskej hali „Króna“ zaso tak daloko: Budyski zapósłanc CDU w Sakskim krajnym sejmje Marko Šiman, 29. raz hosćićel politiskeje popjelneje srjedy, přińdźe zhromadnje z prominencu a swjatočnje přewodźeny wot saznikow do „Króny“. Tule knježeše dawno zaso po bayerskim přikładźe CSU w Passauwje přijomnje wólna atmosfera. Wopytowarjo dachu sej poskićene rybjace całty słodźeć, a wězo tež wulke škleńcy piwa na blidach njepobrachowachu. Přichwatali njeběchu jenož prezident Sakskeho krajneho sejma Matthias Rößler, krajny rada Udo Wićaz, dalši serbski zapósłanc CDU Alojs Mikławšk, zapósłanc CDU w zwjazkowym sejmje Lars Rohwer, prezidentka krajneje direkcije Sakskeje Regina Kraushaar a předsyda Domowiny Dawid Statnik.