Debata w zwjazkowym sejmje wo mjeńšinowych a regionalnych rěčach

Berlin (SN/MkWj). Na njewšědne wašnje su so zapósłancy w Zwjazkowym sejmje za wjace kedźbnosće w Němskej za připó­znate mjeńšinowe a regionalne rěče wuprajili – mjenujcy delnjoněmsce, frizisce, dansce a serbsce. „Regionalne rěče a rěče mjeńšin dyrbja hladane a hajene być, ­zo njebychu zašli“, rjekny Steffen Seidler wot Juhoschleswigskeho wolerskeho zwjazka (SSW) delnjoněmsce. Zapósłanc strony danskeje a friziskeje mjeńšiny ­njeporěča jenož delnjoněmsce, ale tež frizisce a dansce. Simona Koß, zapósłanča SPD w Zwjazkowym sejmje, witaše wobdźělnikow debaty w delnjoserbskej rěči.

Hłowna přičina wot kruha delnjoněmskich parlamentarnikow nastorčeneje debaty bě 25. róčnica Europskeje charty regionalnych a mjeńšinowych rěčow 1. měrca. Rěče mjeńšin wužiwać, běchu sej při tym wuraznje žadali. Zastupnicy narodnych mjeńšin sćěhowachu debatu na tribunje přihladowarjow, mjez nimi předsyda Domowiny Dawid Statnik.