Zwjazk inwestuje 155 milionow eurow do sakskich awtodróhow

Kamjenica (dpa/SN). Wot nalěća maja šoferojo na někotrych wotrězkach zwjazkowych awtodróhow w Sakskej wjace časa zaplanować. Přičina toho su twarske dźěła. Zwjazk chce mjenujcy lětsa 155 milionow eurow do syće sakskich awtodróhow nałožić. Tuchwilu wšak bědźa so šoferojo hišće ze sněhom a hładkimi dróhami. Tola w pozadku fachowcy hižo pilnje twarske dźěła přihotuja. „Wobchad ma na awtodróhach dale běžeć“, wuswětli nawoda Drježdźanskeho stejnišća za awtodróhi Christian Milster wčera w Kamjenicy, hdźež je naprawy předstajił.

K najwobšěrnišim projektam słuša twar zwiska mjeze zwjazkowymaj awtodróhomaj A 72 a A 38 pola Lipska. Tam ma so wosom kilometrow dołhi wotrězk dozhotowić, za čož su 36,5 milionow eurow trěbnych. Wot pózdnjeho lěća dyrbi tam wobchad znajmjeńša na jednej čarje móžny być. Tola tež po tym maja twarscy dźěłaćerjo ruce połnej dźěła. Hač do lěta 2026 ma so wulki dźěl nowotwara wotzamknyć. Potom móža šoferojo wot Vogtlanda hač do Lipska po dwěmaj čaromaj jěć.