Ministerski prezident w Radworju: Rěčna politika a debjenje jejkow

Radwor (SN/mb/MG). Pjećlětna Jadwiga Dźisławkec z Chasowa je wězo jara napjata, prjedy hač ministerski prezident Michael Kretschmer přijědźe. Holca w narodnej drasće jeho při durjach „dwórnišća inkluzije“ strowi. „Jako dźěćo móžeš jemu ty prajić“, je mać Katrin Suchec-Dźisławkowa rozsudźiła, potajkim „Witaj k nam!“ Wona je kopředsydka towarstwa „Staršiska iniciatiwa Radwor“ a čaka tule z předsydku towarstwa „Dwórnišćo inkluzije Radwor“, Raphaelu Wićazowej, na šefa sakskeho knježerstwa. Tež za Madeleine Rynčowu, hižo tři lěta Radworska wjesnjanostka, je to wosebity dźeń, kaž wona Serbskim Nowinam praji, wšako móže prěni raz ministerskeho prezidenta do gmejny witać.