Palm Beach/Washington (dpa/SN). Bywši prezident USA Donald Trump na tym wobsteji, zo je njewinowaty. Wčera přečita statne rěčnistwo skóržbu přećiwo njemu. Tak jemu wumjetuja, zo je wobchodne podłožki w cyłkownje 34 padach na swoje dobro změnił. Systematisce je Trump spytał, negatiwne informacije wo nim njewozjewić, za čož je mjez druhim tež pjenjezy za mjelčenje płaćił. Z tym chcyše wón šansy na wólby prezidenta w lěće 2016 pozitiwnje wobwliwować.

Hnydom po přečitanju skóržby statneho rěčnistwa w New Yorku poda so bywši prezident zaso do Floridy, hdźež prěni raz wumjetowanje komentowaše. Tak wón wuzběhny, zo je stajnje wšitko za to činił, narod zakitować. Po jeho słowach spytaja jeho přećiwnicy tomu zadźěwać, zo móže wón znowa za zastojnstwo kandidować. Justicnemu systemej Trump njedowěri.

Dalši procedere w zwisku z procesom přećiwo njemu budźe so trochu dlijić. Tak je nětko móžno hišće próstwy stajić. ­Prawiznicy Trumpa móhli spytać, wěste podawki do dołhosće ćahnyć, tak zo móhł proces samo zwrěšćić.