Kijew (dpa/SN). Ukrainu njemóže po słowach prezidenta Wolodymyra Zelenskeho rozbuchnjena murja spjateho jězora nad rěku Dnipro na juhu kraja při wróćodobyću wobsadźenych kónčin zadźeržeć. „Wot ruskich teroristow zawinowana katastrofa we wodowej milinarni Kachowska Ukrainu njehaći“, rjekny Zelenskyj wčera wječor w swojim wšědnym widejowym poselstwje. Po jeho měnjenje rozbuchnjenje murje spjateho jězora tomu słuži, ukrainsku přećiwnu ofensiwu znjemóžnić.

Před Bjezstrašnostnej radu UNO w New Yorku stej sej Moskwa a Kijew mjezsobu winu za zničenu murju spjateho jězora Kachowka dawałoj. Ukrainski wulkopósłanc pola UNO Serhij Kislizia rěčeše wčera na krótkodobnje zwołanej nuznej konferency wo „akće ekologiskeho a technologiskeho terorizma“. Rozbuchnjenje je dalši přikład „ludomordarstwa Ruskeje na Ukrainjanach“. Ruski wulkopósłanc Wasili Nebensja porno tomu rjekny, zo je njeskutk „zaměrna sabotaža Kijewa“, kiž ma so jako wójnske złóstnistwo zastopnjować. Kijew je spjaty jězor za „njepředstajomne złóstnistwo znjewužiwał“, zastupnik Ruskeje rjekny.