Elaine Jenčec po woli bazy CDU naslědnica Alojsa Mikławška
Połčnica (SN/mb). Přiklesk po předstajenju kandidatow je hižo pokazał, zo bě 29lětna Elaine Jenčec porno Maikej Försterej (59) faworitka. Tola tajne wothłosowanje 106 čłonow CDU wčera wječor na žurli hosćenca „Třělernja“ w Połčnicy wunjese hišće jasniši wuslědk: Wot 105 płaćiwych hłosow dósta dotalna sobudźěłaćerka zapósłanca Alojsa Mikławška 93, potajkim 89 procentow, za Förstera rozsudźi so 12 čłonow. Z tym běše w 19.34 hodź. jasne: We wólbnym wokrjesu Budyšin 2, do kotrehož słušeja gmeiny zarjadniskeho zwjazka „Při Klóšterskej wodźe“, budźe při klětušich wólbach krajneho sejma kandidatka CDU wo direktny mandat Elaine Jenčec.
