Składnostnje prawicarskich tendencow w Němskej su wšitcy katolscy biskopja wuchodneje Němskeje dźens připołdnju w zhromadnym stejišću napominali, čłowjeske prawa respektować.

Drježdźany (SN/mb). Zo su biskopja wšěch diecezow, kotrychž teritorij słuša dospołnje abo podźělnje do kraja něhdyšeje NDR, zhromadny tekst wozjewili, je „wuwzaće“ w zjawnostnym dźěle cyrkwje – tak wobkrući rěčnik biskopstwa Drježdźany-Mišno Michael Baudisch našemu wječornikej. Tohorunja dotal z wašnjom njeběše, někotre strony eksplicitnje mjenować. W aktualnym dokumenće biskopja zwuraznjeja, zo „njemóžemy pozicije ekstremnych stron kaž III. Weg, Heimat abo tež AfD akceptować.“