Zrudźaca powěsć je do Łužicy dóšła, zo je štwórtk, 25. januara, po dołhej ćežkej chorosći w Erfurće w starobje 90 lět wu­znamny serbski medicinar-wědomo­stnik prof. dr. habil. Klaws Thielmann zemrěł. Wón narodźi so 29. oktobra 1933 w Połčnicy. Tam měještaj jeho serbska mać a jeho němski nan lěkarsku praksu. W małym městačku zastupi hólčec do šule a poda so potom na Lessingowy gymnazij do Kamjenca. Rady jězdźeše z kolesom k swojemu dźědej Mikławšej Kubašej a k swojej ćeće Mari Kubašec, serbskej wučerce a spisowaćelce, na wopyt do Chasowa. Přez wobeju a přez jeho mać zbudźi so jemu lubosć k serbskej rěči, kulturje a stawiznam kaž tež wšědnemu serbskemu žiwjenju. Tohodla poda so młodźenc po 10. lětniku z Kamjenca na Serbsku wyšu šulu do Budyšina. Na šuli přewza zamołwity nadawk organizatora 1. serbskeje kulturneje brigady a přihotowaše wustupy w tu- a wukraju. Tak zezna so z kulturu wosebje słowjanskich ludow. Wón zajimowaše so za kultury druhich ludow a rěčeše pozdźišo tež běžnje jendźelsce, španisce, rusce a francosce.