Prawdźepodobnje wot 1. apryla budźe konop legalna. Prawje tak?

Budyšin (SN/MG). Wot 23. februara je jasne: Konop budźe legalna. Znajmjeńša zdźěla. Tomu je zwjazkowy sejm přihłosował (SN rozprawjachu). Zakonske rjadowanja su poměrnje jasne: 25 gramow smě kóždy nad 18 lětami potom we kapsy měć. Doma maksimalnje tři rostliny abo 50 gramow. Ale što to nětko dokładnje rěka? Kajke změje to wuskutki na naše žiwjenje?

„Drogi su wšudźe po puću, tež w našich serbskich wsach.“ Tole měni wobydlerski policist André Kober, kotryž je w Pančicach zasadźeny, „njemóžemy tež tu ničo wuzamknyć“, wón doda. Zo ­budźe konsum konopje tež w serbskim sydlenskim rumje přiběrać, je jasne. Hižo dźensa konsumuje wjele přewažnje młodych ludźi drogu tajnje.