Třeća Serbska debata wujewi předewšěm ćeže „indigenosć“ definować
Budyšin (SN/bn). Pod hesłom „Štó smy – indigeni, awtochtoni abo něšto druhe?“ su Sakska krajna centrala za politiske kubłanje, Serbski institut (SI), Serbske Nowiny a Załožba za serbski lud wčera třeću Serbsku debatu wuhotowali. Podijowi diskutanća na žurli Budyskeho Serbskeho domu běchu prawiznik a čłon Serbskeho sejma Hajko Kozel, jednaćelka Domowiny Judit Šołćina, etnologa prof. dr. Leoš Šatava a dr. Detlev Rein, bywši nawoda referata za mjeńšinowe prawo a mjeńšinowu politiki Zwjazkoweho ministerstwa za nutřkowne naležnosće. Moderatorka dr. Jana Piňosová (SI) definowaše debatu zahajiwši indigenosć jako „dosć młodu, geografiske a etniske kriterije wopřijimacu kategoriju mjezynarodneho prawa“. Kozel konkretizowaše: „Wopřijeći ‚indigeny‘ a ‚awtochtony‘ pokazujetej do samsneho směra, njesahatej pak jenako daloko. Prašeš-li so Serba, hač je ‚indigeny‘, tomu zawěšće njepřihłosuje, dokelž naposledk ničo z wopřijećom započeć njewě. By-li so za ‚domoródnosću‘ prašał, by wotmołwa hinaša była“.