Kati Struckowa wostanje dale hłownohamtska społnomócnjena

Zhorjelc/Slepo (SN/MG/MiP). Kati Stru­ckowa wostanje hłownohamtska społnomócnjena za naležnosće Serbow w Zhorjelskim wokrjesu. To drje je najwažniša powěsć po skonstituowacym posedźenju wokrjesneho sejmika wčera. Hižo do posedźenja bě namjet frakcije AfD znaty, z kotrymž chcychu zastojnstwo społnomócnjeneje jeno na čestnohamtskej bazy dale wobsadźeć. Tole zbudźi wězo šokěrowane reakcije, wosebje mjez Slepjanskimi Serbami. „To je zrudna a chutna naležnosć“, praji Manfred Hermaš, kotryž je před Kati Struckowej zastojnstwo społnomócnjeneho za serbske naležnosće w Zhorjelskim wokrjesu wukonjał. „Nětko wšak widźimy kak chutnje strona AfD za swojej „pisanej mnohotnosću“ steji, wo kotrejž je we wólbnym boju hladajo na Serbow a serbsku kulturu rěčała. To běchu hołe słowa“, wón podšmórnje. Na wčerawšim posedźenju so zdobom wukristalizowaše, zo njeměješe AfD tute plany jenož za serbsku społnomócnjenu, ale zdobom za społnomócnjenu za runostajenje a za tón zastojnstwo integraciju a wobdźělenje.