Berlin (dpa/SN). Přepytowanski wuběrk zwjazkoweho sejma za wotpinjenje jadrowych milinarnjow Němskeje je so dźensa poslednich swědkow woprašał. Skazali běchu sej ministerku za wobswět Steffi Lemke (Zeleni), bywšeho financneho ministra Christiana Lindnera (FDP) kaž tež nawodu kanclerskeho zarjada Wolfganga Schmidta (SPD). Na zakónčacym zarjadowanju jutře maja minister za hospodarstwo Robert Habeck (Zeleni) a zwjazkowy kancler Olaf Scholz (SPD) na prašenja zapósłancow wotmołwić.
Přepytowanski wuběrk bě loni w juliju z dźěłom započinał. Wón ma rozsudy wobswětlić, kotrež su wotpinjenje jadrowych milinarjow přihotowali a zmóžnili. W srjedźišću steji prašenje, hač su zamołwići móžne dalewjedźenje milinarjow 2022 z neutralnym widom pruwowali. Wosebje unija CDU/CSU Habeckej a Lemke wumjetuje, zo bě zawrjenje milinarjow najebać energijowu krizu z ideologiskich přičin zwoprědka rozsudźene.
