Swjedźenska narěč dr. Christiany Piniekoweje składnostnje konstituowanja 2. Serbskeho sejma 12. apryla we Łazu

Česćeni parlamentarownicy, lubi hosćo, česćeni hosćićeljo!

Wot Božoh‘ słowa witajće! Tak strowja so ewangelscy Hornjoserbja, přišedši z kemšow abo nutrnosće. Dźensa, sobotu 12. haperleje 2025, so schadźujemy, zo by so swjatočnje konstituował druhi raz cyłoserbski parlament, naš Serbski sejm. Přińdźemy z Łazowskeje cyrkwje, w kotrejž Handrij Zejler (1804–1872) jako farar skutkowaše. (...) Dalši wuznamny syn Łazowskich stron, Jan Arnošt Smoler (1816 – 1884), wozjewi w prěnim dźělu serbskoněmskeje wědomostneje encyklopedije Pjesnički hornych a delnych Łužiskich Serbow / Volkslieder der Wenden in der Ober- und Nieder-Lausitz w samsnym času (1841/43) tójšto spěwow z Łaza a wokoliny.

Jeju skutkowanje přinošuje tehdy k rosćacemu politiskemu a kulturnemu serbjewědomju Serbow. We 80tych lětach 19. lětstotka zapisuje Arnošt Muka (1854 –1932) w swojej statistice serbskeje ludnosće za Łaz 467 wobydlerjow – 432 Serbow (93 %) a 35 Němcow.