Što by było, njeby-li so Němska demokratiska republika před 35 lětami Zwjazkowej republice Němskej přizamknyła? Što bych dźensa była? Hdźe bych dźěłała? Kak bych bydliła? Kotru hudźbu bych słuchała, kotre knihi čitała, na kotre wašnje a kajki swět dožiwjała?

W lěće 1990 běch šulerka Serbskeje rozšěrjeneje wyšeje šule Budyšin, dźensnišeho serbskeho gymnazija. Słušach k prěnim, kiž mějachu so za wukonowe kursy rozsudźić. Běch mjez prěnimi, za kotrychž bě jeničce abiturna znamka rozsudna, hač smědźa studować. Bych-li tehdy zmužićiša była, bych lěto w Americe abo Jendźelskej abo hdźežkuli přebywała, kaž su to někotři sobušulerjo činili. Wrota do swěta běchu so nam lěto do toho šěroko wotewrěli.