Unija žadanja SPD wotpokazuje
Reakcije na kónctydźenski stronski zjězd socialdemokratow
Berlin (dpa/SN). Wodźacy zastupnicy CDU a CSU su SPD po jeje stronskim zjězdźe warnowali, z nowymi žadanjemi wulku koaliciju poćežować. Wo koaliciskim zrěčenju nochcedźa znowa jednać, za naprawy k „samozaběrje“ njeje chwile, rjekny generalny sekretar CDU Paul Ziemiak po telefoniskej konferency najwušeho nawodnistwa unije wčera wječor w Berlinje. Na njej běchu so nimo zwjazkoweje kanclerki Angele Merkel (CDU) tež stronska předsydka Annegret Kramp-Karrenbauer (CSU) a Markus Söder (CSU) wobdźěliłoj.
To a tamne (09.12.19)
Horce wino woptał? Natutkany šup je so wčera po Erfurtskich dohodownych wikach motał. Małe zwěrjo bě „wočiwidnje alkoholizowane“, zdźěli rěčnik policije. Test alkohola njejsu přiwšěm žadyn přewjedli. Wohnjowi wobornicy dowjezechu šupa do zwěrjatownje. Podobny pad bě hižo loni w lěću kedźbnosć zbudźił. Tehdy běštaj jěžej rozkidany liker laptałoj a na to po Erfurće błudźiłoj.
Něhdźe 360 zmužitych je so wčera na mjeztym 20. Mikławšowym płuwanju w šwicarskim Zürichu do wosom stopnjow zymneje rěki Limmat zwažiło. Mnozy běchu w Mikławšowym kostimje a mějachu čerwjenu čapku na hłowje. Ličba wobdźělnikow bě po informacijach zarjadowarja rekordna. Płuwarjo dyrbjachu 111 metrow we wodźe zmištrować. Zarjadowanje słuži dobremu skutkej: Wobdźělenski popłatk a dary sponsorow wunjesechu něhdźe 5 500 eurow.
Brinkhaus žada sej jasnosć
Berlin (dpa/SN). Nawoda frakcije CDU/CSU w zwjazkowym sejmje Ralph Brinkhaus žada sej wot SPD jasnosć wo přichodźe wulkeje koalicije. „Stabilne politiske wobstejnosće su wažne za Němsku, rjekny politikar CDU krótko do zahajenja zjězda SPD nowinarjam. „Wěčne personalne diskusije a njewěstosć wo přichodźe koalicije su to poslednje, štož trjebamy.“ Na zjězdźe nochce SPD wo skónčenju wulkeje koalicije wothłosować, chce pak z CDU wo polěpšenjach w koaliciskim zrěčenju jednać, kaž rěkaše.
Demonstruja za klimu
Madrid (dpa/SN). Z wulkozarjadowanjom w centrumje Madrida chcedźa demonstranća dźensa wječor na wobdźělnikow swětoweje klimoweje konferency ćišć wukonjeć. Na protestnym pochodźe statysacow ludźi wobdźěli so tež šwedska klimowa aktiwistka Greta Thunberg. Demonstranća chcedźa zamołwitych, kotřiž so na dwaj tydźenjej trajacej konferency wobdźěleja, pohnuć, zo měli so raznišo na dobro klimy zasadźeć.
Stawki wobchad dale haćili
„Brunicowy kompromis wohroženy“
Magdeburg (dpa/SN). Saksko-anhaltski ministerski prezident Reiner Haseloff (CDU) ma wuhlowy kompromis za wohroženy. Po jeho słowach w rozmołwje z nowinarjemi móhło předewzaće w Sewjerorynsko-Westfalskej „dorěčam njewotpowědowace“ sćěhi měć. Ministerski prezident Armin Laschet (CDU) bě naposledk plany zakitował, runje dotwarjenu nowu kamjentnowuhlowu milinarnju syći připinyć. Za to měli starše milinarnje prjedy zawrěć. W tym zwisku so boja, zo móhła tež milinarnja w Schkopauwje pola Halle potrjechena być. „Hrozy łamk wuhloweho kompromisa“, rjekny Haseloff Magdeburgskim nowinarjam. Poprawom bě planowane, Schkopausku brunicowu milinarnju hač do lěta 2035 dale wjesć. Nětko rěča hižo wo lěće 2026 jako móžnym kóncu. „Jeli nowu milinarnju Datteln IV aktiwizuja, bychu so wuhlowemu kompromisej spřećiwjeli.“
Merkel lěhwo Auschwitz wopytała
Oświęcim (dpa/SN). Zwjazkowa kanclerka Angela Merkel (CDU) je dźensa prěni króć bywše němske koncentraciske lěhwo Auschwitz wopytała. Oficialna přičina je dźesaćlětne wobstaće Załožby Auschwitz-Birkenau, kotraž so za zachowanje wopomnišća na terenje něhdyšeho lěhwa zasadźa. Hladajo na historisku zamołwitosć Němskeje za złóstnistwa za čas nacionalsocializma chcedźa Zwjazk a kraje załožbje za zachowanje wopomnišća 60 milionow eurow přewostajić.
Spočatnje je kanclerka w bywšim zakładnym lěhwje Auschwitz při tak mjenowanej Čornej sćěnje wopory nacionalsocialistow wopominała. Na tym městnje běchu woni tysacy jatych zatřělili. Po tym wopyta Merkel zaničowanske lěhwo Auschwitz-Birkenau, hdźež běchu něhdźe milion ludźi w płunowych komorach zamordowali. Tam wočakowaše ju pólski ministerski prezident Mateusz Morawiecki. 27. januara budźe tomu 75 lět, zo bu lěhwo wuswobodźene.
To a tamne (06.12.19)
Mały kusk płatu steji w srjedźišću: Bikini dóstanje swójski muzej. Regensburgski předewzaćel Alexander Ruscheinsky zarjaduje w Bad Rappenauwje pola Heilbronna BikiniArtMuseum, kotryž chcedźa klětu wotewrěć. Na 1 500 kwadratnych metrach chce muzejownik wuwiće kupanskeje mody wot lěta 1880 hač do přitomnosće dokumentować. Přehladka wopřijima 1 200 bikinijow.
Wobškodźeneho a zanjerodźeneho hotela dla je so měšćanske partnerstwo mjez sakskim Torgauwom a pólskim Strzegomom nimokuliło. Město Torgau bě 27. nowembra wobzamknyło partnerstwo zběhnyć. Přičina su njerjane podawki za čas wopyta delegacije ze Strzegoma w oktobru. Nimo skóncowanych meblow běchu hosćo tež ekskrementy w stwach zawostajili. W Strzegomje twjerdźa, zo su wumjetowanja přehnate.
„W politice dyrbiš druhdy něšto měć, štož druzy nimaja“
W zwjazkowym sejmje so jako eksotka nječuła
Zapósłanča Němskeho zwjazkoweho sejma, předsydka rady Załožby za serbski lud, pozdźišo Rady za serbske naležnosće Sakskeje, předsydka Budyskeho wokrjesneho zwjazka CDU a čłonka Zwjazkoweho předsydstwa Domowiny – to su jenož někotre zastojnstwa, w kotrychž Marju Michałkowu znajemy. Jutře swjeći Lichanjanka sydomdźesaćiny. Přiležnosć to Axelej Arltej, so z njej rozmołwjeć.
Na kotre dožiwjenja z časa dźěćatstwa so wosebje rady dopominaće?
M. Michałkowa: Mojej staršej měještaj mały burski statok. My dźěći dyrbjachmy tuž hižo jara zahe kokoše picować, so wo kački starać. Na łukach smy husy pasli a hladali, zo wone njećeknu. Naš nan je ze mnu tež w zymje často do Łomšćanskich hatow jězdźił. Wokoło ptačeho kwasa žněješe tam rohodź. Husto běchmy z kolesom w Radworju na někajkich zarjadowanjach. Na jězbje sydach na prěčnej žerdźi. W swójbje smy jara wjele spěwali. Njedźelu po kofeju mějachmy často wopyt, tež tam přeco spěwachmy, a naš nan hraješe na akordeonje.
Što z toho bě Wam wažne, zo sće to swojim dźěćom dale dała?
SPD hotuje so na zjězd
Berlin (dpa/SN). Dźeń do napjeće wočakowaneho stronskeho zjězda SPD w Berlinje su dźensa hišće raz dokument wobdźěłali, kotryž ma prěni połčas wulkeje koalicije CDU/CSU a SPD bilancować. Stronske předsydstwo chcyše naćisk w běhu dnja schwalić. Přichodnaj předsydaj socialdemokratow Saskia Esken a Norbert Walter-Borjans běštaj naćisk z prezidijom strony předźěłałoj. Wočakuja, zo so přiwisnicy wulkeje koalicije na kóncu přećiwo pesimistam w stronje přesadźa.
Wotsadźenje woprawnjene
Washington (dpa/SN). Wjacori profesorojo prawniskich wědomosćow su prezidentej USA Donaldej Trumpej w kongresu přeńdźenja wumjetowali, kotrež bychu jeho wotsadźenje woprawnili. Trump je swoje zastojnstwo na dobro wosobinskich lěpšin znjewužiwał, za čož měli jeho wotsadźić, rjekny Noah Feldman z Harvardskeje uniwersity w justicnym wuběrku. Demokraća Donaldej Trumpej wumjetuja, zo je ukrainskeho prezidenta Zelenskeho nuzować chcył, přepytowanja přećiwo Trumpowemu kontrahentej Joewej Bidenej zahajić.
Wušo hromadźe dźěłać
Generalny stawk francoskich dźěłarnikow přećiwo rentowej reformje ...
Přez stronske mjezy na dobro Serbow dźěłać
Budyšin (SN/MkWj). Bywši zapósłanc Lěwicy w Sakskim krajnym sejmje Hajko Kozel je dale rěčnik Budyskeho wokrjesneho zwjazka strony za serbske naležnosće. Delegaća wokrjesneho zjězda su jeho minjenu sobotu w zastojnstwje wobkrućili. Kozelej je w tym zwisku wosebje wažne, zo je tak zastupnistwo Serbow we wokrjesnym předsydstwje Lěwicy dale zaručene, kaž wón Serbskim Nowinam rjekny.
W swojej funkciji chce so rodźeny Stróžan za to zasadźeć, zo zakładne zhromadne dźěło na dobro Serbow přez stronske mjezy pěstuja, na přikład ze serbskej skupinu w SPD a pola Zelenych. Po tym puću móhli němskich wobydlerjow bóle za serbske temy sensibilizować, wšako woni nutřkoserbske naležnosće njeznaja. Swoje informacije poćahuja ze Sakskeje nowiny abo z němskorěčneje přiłohi SN. Wažne Kozelej tohorunja je, w koaliciskimaj zrěčenjomaj Sakskeje a Braniborskeje zakótwjene serbske naležnosće zwoprawdźić. Tak chce wón tež ministerstwa narěčeć.
