Peking (dpa/SN). Při ćežkim zemjerženju na sewjerozapadźe Chiny je znajmjeńša 118 wosobow zemrěło. Kaž statna powěsćernja Xinhua rozprawja, bu wjace hač 500 ludźi zranjenych. Statny a stronski šef Chiny Xi Jinping namołwi, wšitko za to činić, wjele ludźi wuchować.

Swědcy mjeztym rozprawjachu, zo je zemjerženje škody na domach a infrastrukturje zawiniło. We wjacorych wjeskach nimaja žanu milinu. Tež ludźi z wodu zastarać, móžno njeje. Dale tam tuchwilu ćahi njejězdźa.

Po informacijach lokalneho zarjada za wjedro docpěja temperatury w potrjechenym regionje minus dźesać stopnjow celsiusa. Wohnjowoborny a wuchowanski zarjad su tuž pomocnikow do kónčiny pósłali.

Chinske statne medije pokazachu fota ludźi, kotřiž po zemjerženju ze swojich domow ćeknychu a při zymskich temperaturach na přikrywach zawaleni pod hołym njebjom wutrachu. Statna telewizija pokaza wuchowanske mocy, kotrež pytachu w rozpadankach za přežiwjenymi.

Zakitowanski minister Pistorius a baltiski kolega sej přezjednaj

Vilnius (dpa/SN). Němska a Litawska, wobaj partneraj w NATO, chcetej hač do lěta 2027 dospołnje do boja kmanu němsku bojowu brigadu w baltiskej republice nastajić. Za robustnu a na wójnu přihotowanu brigadu zwjazkoweje wobory chcedźa wobšěrnu infrastrukturu w Rūdninkai njedaloko stolicy Vilniusa kaž tež w Rukla pola Kaunasa natwarić. Na to staj so zakitowanski minister Boris Pistorius (SPD) a jeho litawski kolega w zastojnstwje Arvydas Anusauskas wčera dojednałoj. Na woběmaj wojerskimaj stejnišćomaj maja kaserny a bydlenja po němskej potrjebje nastać, w zdźělence rěka. Wobaj ministraj staj w swojim we Vilniusu podpisanym „jězbnym planje“ potwjerdźiłoj, zo chcetej wobaj krajej „mjezsobnje kóždy kwadratny centimeter zwjazkarskeho teritorija w kóždym času zakitować a swobodu a demokratiju wotpowědujo artiklej 5 Washingtonskeho zrěčenja škitać“. Ruska nad­padniska wójna přećiwo Ukrainje je wěstotne połoženje radikalnje změniła.

Moritzburg (dpa/SN). Lěsy w Sakskej wostanu po měnjenju krajneho knježerstwa dale pacient. „Njeje žanoho polěpšenja: Lěsy su dale w špatnym stawje a přičina wulkich starosćow. Klimowa kriza a skórnik zawostajeja hłuboke rany“, ­rjekny minister za lěsnistwo Wolfram Günther (Zeleni) wčera w Moritzburgu při předstajenju noweje rozprawy wo połoženju lěsow. Cyłkownje je so situacija w lěsach swobodneho stata wot lěta 2018 jara kritisce wuwiła. Po najnowšim přepytowanju wučinja podźěl škodowanych štomow kaž hižo 2022 dale 35 procentow. Jenož 23 procentow štomow je bjez škodow. Straty jehlinowcow a lisćowcow wučinjeja 26 procentow. To je jenož procent mjenje hač w najhóršim lěće 2022. „Jako sćěh klimoweje krizy je přesucho a přehorco. Štomy ćerpja, škódniki maja wjace móžnosćow. Lěsna póda wuschnyje. Naša wotmołwa je přetwar lěsow.“ Ze swojim dźěłom su zamołwići lětsa tójšto tomu přinošowali, škody w lěsach wobmjezować, minister chwaleše. Najebać to su škody skórnika dla na historisce wysokim niwowje. Jasnje widźomne su prózdne městna w něhdy hustych lěsach.

Berlin (dpa/SN). Zajimowy zwjazk „Alianca za kolije“ je Zwjazk znowa namołwjał, we wobłuku strukturneje reforma železnicy jasne měritka a zaměry postajić. „Zwjazkowy sejm měł měritka z płaćiwosću wjacorych lět wobzamknyć“, rjekny hłowny jednaćel Dirk Flege wčera w Berlinje. Němska železnica chce 1. januara strukturnu reformu zwoprawdźić. Při tym załoža nowu towaršnosć, kotraž ma za wobhospodarjenje, ponowjenje a wutwar kolijoweje syće zamołwita być. Alianca za kolije žada sej jasne měritka dźěła noweje towaršnosće. Dypkownosć njesměł jenički kriterij być. Tole móhło k tomu wjesć, zo mjeńše twarnišća zanjechaja, bjez kotrychž pak dotrjebanu syć ponowić njemóža. Runje tak njejasne je prašenje, što so z dobytkami noweje towaršnosće stanje. W najhóršim padźe wjele pjenjez do systema klumpaja, bjeztoho zo su polěpšenja woprawdźe widźomne. Nimo toho zwjazk skorži, zo nimaja w Němskej žadyn wobchadopolitiski koncept, kiž ­wšitkich nošerjow wobchada wobkedź­buje. „Wšitcy spytaja, to zachować, štož maja. Woprawdźity rozmach njeje widźeć – najebać wšě lubjenja.“