Wjeršk bě testowa hra
Žónska wubranka treningowe lěhwo w Choćebuzu přewjedła
Za dwanaće dnjow započnje so w italskim Južnym Tirolu Europeada 2016. Za tutón wulki sportowy podawk je Serbska koparska wubranka žonow kónc tydźenja w Choćebuzu dalši króć zhromadnje trenowała. Z třomi transporterami podachu so serbske hrajerki z trenarjomaj minjeny pjatk do delnjołužiskeje metropole, hdźež přenocowachu w krasnej młodowni při klóšterskim naměsće. Po wječeri wobhladachu sej koparki a trenarjej Pětr Bejmak a Handrij Rachela sportowy centrum, kotryž je blisko młodownje. To je jedna z najwjetšich a najmodernišich sportowych připrawow w Kraju Braniborskej. Ke kompleksej słušeja lochkoatletiski stadion, kolesowarski stadion, hala za lochkoatletiku kaž tež ćěłozwučowarnja a wjacezaměrowa hala za wšelake druhe sportowe družiny.
Sport (03.06.16)
Koparki chcedźa postupić
Biskopičanske žónske koparske mustwo, kotrež hraje w krajnej lize a w kotrymž tež wjacore žony Serbskeje koparskeje wubranki za bulom honja, chce do regionalneje ligi postupić. Za to pak dyrbi dwójce přećiwo žonam FC Grimmy nastupić. Prěni z duelow budźe njedźelu w 14 hodź. w Biskopicach.
Motocross na Kaponicy
Krajne motocrossowe mišterstwa přewjedźe ADAC Sakska njedźelu, 5. junija na Jaworskej Kaponicy. Tam startuja motocrossowi piloća w sćěhowacych klasach: Sakska-dźěći, Sakska-mužojo, Sakska-hobby a LVMX-kwad. Swobodny trening započnje so rano we wosmich. Přizamknje so winowatostny trening. Prěni hódnoćenski běh budźe zajutřišim w 12.35 hodź., druhi w 15.35 hodź. Mytować chcedźa dobyćerjow we 18.30 hodź.
Wubranka žonow testuje
Njedźelu, 12. junija, chce Serbska koparska wubranka žonow do europeady posledni raz swoju formu testować, a to w Pančicach přećiwo SV Großnaundorfej, kotryž hraje w krajnej klasy. Zakop partije budźe w 11 hodź.
Koparske dypkowe hry
03.06. 19:00 Njebjelčicy
– Großröhrsdorf II
04.06. 13:00 Kulow II – FC Łužica II
04.06. 15:00 Mały Wosyk
– Marijina hwězda II
Žněja płody wuspěšneho dorostoweho dźěła w minjenej sezonje
Zakónčena hrajna doba běše za blidotenisowy dorost Viktorije Worklecy nadměru wuspěšna. Mustwje młodostnych kaž tež šulerjow stej wuspěšnje trenowałoj a konstantnje dobre wuslědki docpěwałoj.
Za Worklečansku młodźinu hrajachu: Roberto Koch, Toni Nuk, Julian Hrjehor a Fabian Matka.
Za šulerjow nastupichu: Adrienne Matka, Jurij Čornak, Dawid Mark, Benjamin Grutka a Jerome Wićaz.
Na kóncu sezony 2015/2016 zawěsći sej zastupnistwo młodźiny wuběrne druhe městno. Wone dyrbješe so jeničce zasłužbnemu dobyćerjej stafle, Großröhrsdorfej, dwójce kłonić. Wšitke tamne partije je za sebje rozsudźiło.
Mustwo šulerjow wobsadźi po dźesać hrach z wurunanej bilancu dobre štwórte městno. Wosebje zwjeselacy bě wulki postup w druhej połseriji, w kotrejž je jeničce suwerenemu načolnikej tabulki, Zeleno-běłym Halštrow, podležało. Předewšěm wukon Benjamina Grutki ma so wuzběhnyć. Z dźewjeć dobyćemi a jeničkej poražku měješe dźesaćlětny Sernjančan najlěpšu bilancu w swojim křižu. Brawo!
Wuslědki (02.06.16)
Wokrjesna koparska liga, stafla II
FC Łužica – Ralbicy/Hórki II 2:3 (1:2)
Wětnica/Hola – Hórnikecy 1:0 (0:0)
Lubuš – Njeswačidło3:2 (2:2)
Bluń – Šćeńca3:2 (0:1)
Ćisk II – Nowe Město II 1:1 (0:0)
N. Hrabowka – HZ Łaz 3:0 (1:0)
Wojerecy 1919 – Hory II 4:0 (1:0)
1. Wojerecy 1919 25 78 : 19 58
2. Rakecy II 25 59 : 23 50
3. N. Hrabowka 25 59 : 40 43
4. HZ Łaz 25 42 : 24 43
5. FC Łužica 26 52 : 39 43
6. Hórnikecy 25 49 : 42 41
7. Lubuš 25 56 : 59 39
8. Nowe Město II 25 83 : 45 37
9. Bluń 25 50 : 53 37
10. Njeswačidło 25 54 : 51 35
11. Ćisk II 26 51 : 73 32
12. Hory II 25 46 : 45 29
13. Ralbicy/Hórki II 25 49 : 56 28
14. Wětnica/Hola 26 35 : 95 17
15. Šćeńca 25 31 : 130 7
Jenož k remisej dosahało
TSV 1859 Wjernarjecy
– ST 1922 Radwor 3:3 (2:3)
Zestawa hosći: Wróbl – Šěrak Fabian, Henka, Šěrak Clemens, Wjeńka, Šram, Nuk, Mark, Omran, Winar, Hančik (82. Handrik)
Budyska pěstowarnja na olympiadźe najlěpša była
Najbóle sportowske dźěćace dnjowe přebywanišćo wokrjesa Budyšin lětsa je Budyska pěstowarnja „Benjamin Blümchen“. Po dźewjeć předkołach doby wona finale wokrjesneje olympiady. 127 pěstowarnjow, telko kaž hišće ženje, bě namołwu so na wurisanjach wobdźělić, sćěhowało. Za wulke finale w Budyšinje kwalifikowaše so 20 kubłanišćow. W sportowej hali na Třělnišću běchu wjacore komplikowane stacije natwarjene. Njeje tuž zadźiwało, zo běchu wuslědki přeco snadne. Při mytowanju dobyćerjow pomhaštej maskotce wokrjesneho sportoweho zwjazka Oly a Pia. Kóžde dźěćo dósta medalju, kóžde mustwo wopismo a dobyćer přidatnje pokal. Slěbornu medalju wubědźichu sej dźěći z Dobruše a bronzowu dźěći z Ramnowa, kotrež słušachu jako zakitowar pokala k faworitam. Mytowanje přewzaštaj Budyski wyši měšćanosta Alexander Ahrens (njestronjan) a čłon prezidija wokrjesneho sportoweho zwjazka Dietmar Stange.
Zaměstnjenja prěnich třoch:
1. pěstowarnja „Benjamin Blümchen“ Budyšin
2. ASB-pěstowarnja „Erfindergarten“ Słónkecy (Schlungwitz)
3. pěstowarnja „Spatzennest“ Ramnow
Wuslědki (01.06.16)
Wokrjesna koparska liga, stafla I
Póst Budyšin II – Mały Wjelkow 8:2 (6:1)
Wjernarjecy – Radwor 3:3 (2:3)
1. ST Budyšin 25 81 : 30 62
2. Malešecy 25 71 : 29 54
3. Załom 25 74 : 29 47
4. HZ Budestecy 25 72 : 41 47
5. Kubšicy 25 51 : 29 45
6. Radwor 25 60 : 33 40
W derbyju doma podležała
ST Marijina hwězda
– SJ Njebjelčicy 0:2 (0:0)
Zestawa domjacych: O. Schmidt – Wróbl (75. Rab), Škoda, Łušćanski, Lipič, Peschmann, Bělk, T. Jurš, P. Schmidt, Pakoßnick (65. Winkler), D. Jurš
Zestawa hosći: Hahn – Kral, Haška, Hanuza, Hoelzel (32. Kubaš), Cyž, Hommel, Čornak (65. Šołta), Hrjehor, Deleńk, Korjeńk (81. Lejnart)
Před 100 přihladowarjemi přewjedźechu koparjo susodneju sportoweju jednotkow derby. W prěnich mjeńšinach měještaj cyłkaj hišće respekt před sobu a duel wotměwaše so zwjetša w srjedźnym polu. Njebjelčenjo agěrowachu chětro defensiwnje, startowachu pak přeco zaso kontery. Tak přesadźi so Hrjehor we 18. min. na prawej stronje a zwrěšći na wuběrnje reagowacym wrotarju Oliveru Schmidće. Dwě mjeńšinje pozdźišo posłuži Bělk Dawida Jurša. Tón pak steješe w nimohrě, jako wrotarja Hahna přezběhny. Při wólnym kopje Škody ze zdalenosće 40 metrow běše Hahn znowa na městnje (36.). Hóstni koparjo wustupowachu z wulkej taktiskej disciplinu a mějachu přez Korjeńka do přestawki hišće dwě móžnosći.
Wuslědk kaž na třělnišću docpěli
SJ Chrósćicy
– FSV Łuty 9:0 (4:0)
Zestawa domjacych: Králíček – Schulze, Teichmann, Šafář (46. Zahrodnik), Bětnar, Žur, Runt, Domaška, Dórnik, Věchet (62. Latkolik), Šmit (46. Młynk)
Njedźelu drje njebě kermuša w Chrósćicach, wrota pak padachu na tamnišim sportnišću kaž na třělnišću. Při horcych temperaturach a smalatym słóncu pokazachu Chróšćanscy koparjo wšu swoju radosć při honjenju za bulom. Hnydom w 2. min. dobra přihrawka Dórnika na Věcheta, tón pak dołhi kut snadnje misny. Krótko na to šmórny pospyt hosći tež wo centimetry nimo wrotow Králíčeka. Wotnětka pak so hra nimale jenož we Łutowskej połojcy wotměwaše. Wólny kop, kotryž bě Domaška wysoko do šěsnatki přinjesł, zhłójčkowa samlutki stejacy Věchet bjez problema k 1:0 do saka (13.). Jenož mjeńšiny na to sej „Rudi“ Věchet štyrjoch škitarjow do rejki prošeše, zarejowa jim suk do nohow a k tomu hišće kulowatu kožu w klětce zaměstni (19.). A dokelž so jemu runje derje hraješe, sčini jeno sekundy na to hattrick perfektny. Runt bě Věcheta wulkotnje posłužił, a tón na 3:0 zwyši (21.). Krótko do połčasa postara so Žur z niskej trělwu do dołheho kuta wo štwórte wrota (43.).
Faworit wojować dyrbjał
TSV Wachau
– Sokoł Ralbicy/Hórki 1:3 (1:0)
Zestawa hosći: Gloxyn – Matka (46. Bejma), S. Bjeńš, B. Bjeńš, von Köding, Šewc, Wałda (75. Kurjat), Lulak, Šołta, Bejmak, Domaška
Delanscy koparjo nastupichu přećiwo cyłkej, kotryž hraješe bjeze wšeho ćišća, wšako z wokrjesneje wyšeje ligi zestupi. Konstelacija běše tuž jasna a Sokoł wězo faworit. We 8. min. dósta so bul po stacijach Šołta a Domaška k Bejmakej, kiž pak předołho přemyslowaše. Tak bu wot škitarja při jasnej móžnosći blokowany. Na to so hižo wjele njesta. Domjacy sćahnychu so do swójskeje połojcy a Ralbičenjo njemějachu městno za kombinacije. Wachaučenjo pak hrajachu jara robustnje a klakachu so do kóždeho dwuboja. Zmylk Gloxyna wjedźeše w 24. min. k nawjedowanju hosćićela. W šěsnatce chcyše wón bul Matce přihrać, ale srjedźopólny hrajer to čuješe a sej bul doběža. Matka spyta hišće wrotam zadźěwać, běše pak bjezmócny.
