W Choćebuzu wotmě so tydźenja tradicionalny 12. łužiski brunicowy cup, a to z wosom koparskimi mustwami. Wobdźělene cyłki z Braniborskeje a Sakskeje hraja hewak w krajnych klasach abo ligach. Zakitowar pokala běše mustwo z Běłeje Wody.
Tež wubranka Serbskich balokoparjow z Delnjeje Łužicy je dotal hižo dwójce pódla była. Lětsa pak nastupichu woni zhromadnje z hrajerjemi Serbskeje koparskeje wubranki jako měšane Serbske mustwo. Hladajo na bližacu so europeadu běše to dalša móžnosć, mustwo skrućić a so intensiwnišo zeznajomić. Zamołwitymaj Horstej Krautzigej a Andréjej Strelowej bě dźesać koparjow k dispoziciji. W předkole hrajachu Serbja přećiwo mustwam Gołkojčanske ST 1896, SV Fichte Kunersdorf a 1. FC Gubin.